Osasunak Elcheren aurka berdindu du (0-0)

Club Atlético Osasunak puntu bat eskuratu zuen Elchera egindako bisitan (0-0), norgehiagoka zail batean. Talde gorritxoak atea hutsean mantentzea lortu zuen, Sergio Herrerak partida bikaina egin baitzuen, eta aukera onak sortu zituen arren, azken metroetan zehaztasuna falta izan zitzaion.

Partida Elcheren lehen iritsiera goiztiar batekin hasi zen; Sergio Herrerak urrundu ahal izan zuen baloia eta aldaratzean Álvarok kanpora errematatu zuen. Minutuak igaro ahala, jokoa parekatu egin zen, nahiz eta etxeko taldeak baloiaren jabetza handiagoa izan eta gorritxoak arriskua sortzen saiatu ziren erdiraketa lateralekin, baina ez zuten errematatzailearik aurkitu. Víctor Muñozek aukera ona izan zuen aurkariaren arean kontrol bikain baten ondoren eta bira erdian jaurtita, baina baloiak etxeko atzelari batean jo zuen. Talde ilizitarrak bi hurbilketa arriskutsu izan zituen jarraian. Lehenik, Álvaroren beste jaurtiketa bat arearen barrutik, langa gainetik joan zena, eta ondoren, Cepedaren errematea, Javi Galánek estali zuena.

Bigarren zatian, Osasunak aurrerapausoa eman zuen eta laster iritsi zen etxekoen ate ingurura. Budimirrek aukera ona izan zuen Aimarren pase bikain baten ondoren, baina kroaziarraren jaurtiketa kornerrera joan zen atzelari batek desbideratu ostean. Kornean, talde gorritxoko ‘17’ak buruz errematatu zuen, baina berriro ere atzelari batekin egin zuen topo. Elchek erreakzionatu egin zuen eta André Da Silvak bi aurrez aurre izan zituen Sergio Herreraren aurka, baina atezain gorritxoak bi geldiketa ikusgarrirekin irabazi zion partida bietan. Osasunaren aldetik, Budimir area barruan erori zen R. P. Bigasekin izandako jokaldi batean, baina ez epaileak ez VAR-ak ez zuten esku hartu nahi izan. Minutu batzuk geroago, Aimarrek bi aurkari gainditu zituen arean egindako erregate bikain batekin eta Raúli eman zion baloia, baina erdigunetik egindako erremateak atzelari batean jo zuen eta aldaratzean, V. Rosier-en jaurtiketak ere jokalari ilizitar batekin egin zuen topo. Azken minutuetan, partida hautsi egin zen eta bi taldeek izan zituzten garaipena lortzeko aukerak. Sergio Herrerak berriro ere geldiketa handi bat egin behar izan zuen Álvaroren jaurtiketa indartsu baten aurrean, eta gorritxoen aldetik, Aimarren azken minutuko jaurtiketa bat arearen barrutik, zutoinaren ondotik igaro zen ia ukituz.

Berdinketa honekin, Alessio Lisciren taldeak 30 puntu batu ditu eta bere bolada ona luzatu du, bost partida jarraian galdu gabe. Osasunaren hurrengo partida larunbatean izango da, otsailaren 21ean, 18:30ean, Sadarren, Real Madriden aurka.